Wêreldwyd se Wêreldgids is die beste plek vir Suid-Afrikaners in die buiteland om met Suid-Afrikaanse ondernemings in die buiteland in kontak te kom. Hier is winkels wat Suid-Afrikaanse gunstelinge verkoop, kerke wat dienste in Afrikaans aanbied en ook dokters, prokureurs, motorwerktuigkundiges en nog baie meer – alles en almal so reg uit Suid-Afrika uit. Elke week kies die Wêreldwyd-span een van die ondernemings op die gids om in die Kollig te verskyn. Hierdie week is dit Rusky Business in die VSA se beurt.

Daar is min dinge wat “vinnige ontbyt” sê soos ‘n heerlike stukkie beskuit, dit is iets wat ons as Suid-Afrikaners maar net te goed ken. Dit is ook een van die goed wat baie Suid-Afrikaanse ekspats na verlang – want biscotti is darem net nie dieselfde nie.

Rusky Business het begin as ‘n guns. As jy ‘n bo-baas bakker is en ‘n vriend vra vir beskuit, dan bak jy maar. Daarom skryf die eienaar van Rusky Business dat haar onderneming min of meer dieselfde begin het as Ouma Greyvenstein (Ouma Beskuit) s’n. Nadat ‘n vriend gevra het sy moet vir hom beskuit bak het sy die res verkoop aan ander Suid-Afrikaners in haar omgewing – die oorblywende ses dosyn beskuit het binne vyftien minute uitverkoop!

Vandag spog Rusky Business met verskillende geure beskuit en selfs t-hemde met Suid-Afrikaanse sê-goed.

As jy in die VSA woon en jy verlang na heerlike tuisgebakte beskuit dan kan jy dit aanlyn by Rusky Business bestel.

Besoek Rusky Business se Facebookblad hier

Besoek Rusky Business se profiel op die Wêreldgids hier

Lys jou onderneming hier