Darrell Roodt se rolprent Treurgrond raak ’n omstrede onderwerp aan: Dit kyk na die kwessie van plaasmoorde in Suid-Afrika. Die uitgesproke akteur, musikant en aktivis Steve Hofmeyr speel Lukas, die sagmoedige boer wat sentraal tot die storie staan. Lukas probeer sy familie, sy plaas en die breër gemeenskap beskerm wanneer ’n vlaag plaasmoorde die gemeenskap tref. Buiten die plaasmoorde is daar ook ’n grondeis teen Lukas se grond ingedien. Lukas en sy vrou Nellie (gespeel deur die bekroonde aktrise Erica Wessels) probeer voortboer te midde van hierdie uitdagings. Ander karakters wat die fliek bevolk, is die jong speurder Helena Schoeman (Jana Strydom) en die polisiesersant Morena (Richard Lukunku), wat hard probeer om uit te werk wie verantwoordelik is vir die grusame moorde en poog om verdere geweld te keer. Kykers sal ook vir Daniel en Katie Lebona en hul seun Edwin ontmoet. Daniel (Boikie Pholo) is Lukas se getroue voorman op die plaas, maar dis sy seun Edwin (Graeme Kriega) wat die grondeis teen Lukas bring. Katie (Shaleen Surtie-Richards) is die onderwyseres by Lukas se plaasskooltjie, maar Nellie voel Katie misbruik Lukas se sagmoedigheid.
Roodt is ’n bekroonde regisseur wat bekend is vir flieks soos A place of weeping (1986) en Sarafina! (1992). Hier pak hy ’n ontstellende onderwerp aan en probeer om bewustheid te kweek van ’n krisis wat soveel Suid-Afrikaners raak. Die kinematografie is asemrowend en daar is oomblikke van rou emosie wat kykers gaan ontroer. Wees egter gewaarsku dat Treurgrond grafiese tonele bevat wat sommige kykers dalk mag ontstel.
As jy graag flieks soos Treurgrond wil kyk wat Suid-Afrikaanse kwessies aanspreek, teken in op ShowMax: Daar is ’n wye verskeidenheid Afrikaanse en Suid-Afrikaanse flieks vir elke smaak en jy kan dit kyk net waar en wanneer dit jou pas.
Deel op
