Uit en tuis is ’n rubriek waarin ons gesels met mense wat in die buiteland woon, of wat daar gewoon en gewerk het, maar weer terug is in Suid-Afrika. Ons hoor graag van enigeen wat hul belewenisse met ons wil deel.

Vandeesweek gesels ons met Lize Strydom, wat in Nederland woon.

Hallo, Lize! Van waar in Suid-Afrika is julle oorspronklik en waarom het jy besluit om in Nederland te gaan woon?

Groete uit Nederland. Ek kom oorspronklik uit Pretoria, was by Menlopark op skool en daarna by die Universiteit van Pretoria om BCom Kommunikasiebestuur te studeer. My eerste stap uit Pretoria was na Kaapstad om daar te begin werk. Na die eerste jare van werk het ek tog kriewelrig begin raak om my vlerke verder te sprei. Uit my vriendekring het ek gehoor van au pair-werk in Nederland. In November 2006 het ek in Nederland geland.

Vertel ons meer van jou gesin.

Ek het ’n nuwe saamgestelde gesin. My eerste man is in 2021 aan ’n hersentumor oorlede. Ek het ’n seun van 10 jaar. In 2023 het ek weer getrou met my man, André. Hy het ook sy vrou verloor en het ’n dogter van 11 jaar. Saam het ons nog ’n dogtertjie gekry wat oor ’n paar maande twee word.

Praat julle Afrikaans met mekaar? Watter Suid-Afrikaanse tradisies leer julle vir jul kinders? Van watter Afrikaanse hulpmiddels maak julle gebruik?

My gesinslewe is Nederlands. Ek is die enigste Suid-Afrikaner in my gesin, maar ek bly Afrikaans praat met my kinders. Tuis het ek wel baie Afrikaanse elemente bv. ’n gemsbokkop van krale, ’n rymboek van Pieter W Grobbelaar, shweshwe-tafeldoeke en Afrikaanse kinderliedjies.

Was dit moeilik om aan te pas, of het jy maklik nuwe vriende gemaak en by die gemeenskap ingeskakel?

In my au pair-jaar het ek baie geleer van Nederlandse leefstyle. Ek het vriende gemaak deur in kore te sing. Verder weet ek hoe belangrik kontak met jou bure en skoolgemeenskap is. Ek doen moeite om kontak te maak met my omgewing, tuisfront in Suid-Afrika en vriende wat oor die wêreld versprei is.

Wat was vir jou die vreemdste om aan gewoond te raak in die buiteland?

Die klimaat in Europa is soveel anders en dit het ’n groot invloed op jou eetgewoontes, vel, beweging, kleredrag en gemoed.

Jy het genoem dat jy vir ’n jaar lank ’n au pair in Nederland was en daarna jou meestersgraad in Bedryfskunde aan die Universiteit van Amsterdam aangepak het. Vertel ons meer van hierdie ervarings en hoe jy besluit het om na jou au pair-werk jou meestersgraad aan te pak.

Ek het my au pair-jaar ook gebruik om te dink aan my toekoms en te ontdek watter verskillende opsies daar was. My skripsie was oor Nederlandse filmkomponiste en hulle bedryfsrol in ’n projek. Bedryfskunde in die kulturele bedrywe het my nog altyd gefassineer. Met ’n meestersgraad kon ek in die internasionale bedryf, Universal Music, ’n werk kry as kennismigrant.

Jy het genoem dat jy jou eie au pair-buro, The Au Pair, begin het? Vertel ons asseblief meer daarvan. Waar het die idee vandaan gekom? Hoe verloop jou tipiese werksdag?

Ná my ervaring in internasionale bedrywe het ek tog die wens gehad om vir myself te werk. Vir my was dit logies om met die au pair-buro my bedryfskunde, persoonlike ervaring en skakel met Suid-Afrika te gebruik om ’n suksesvolle onderneming te begin. As ondernemer het ek die vryheid om my werk te verdeel met my gesinslewe.

Het jy enige raad vir mede-Suid-Afrikaanse emigrante wat hul eie ondernemings in die buiteland wil begin?

Vat die kans, lees goed oor Nederlandse bedryfslewe, kry ’n goeie bedryfs- en belastingadviseur en leer om goed Nederlands te praat.

Wat is die een ding wat jy wens jy in jou tas kon pak toe jy geëmigreer het?

My klavier. Ek moes een hier koop. Ek kon ook nie erfstukke oorbring nie.

Is daar enige Suid-Afrikaanse ondernemings (winkels, restaurante, dienste) naby wat julle graag ondersteun?

Ja, vir die au pairs hou ek elke jaar ’n braai en ons koop al ons inkopies by Die Spens, die grootste Suid-Afrikaanse winkel in Nederland.

Hoe verskil die kossoorte in Nederland van dié in Suid-Afrika?

Suid-Afrika het beslis ’n groter verskeidenheid en dit smaak beter.

Enige lesse wat julle geleer het?

Suid-Afrikaners is uniek en ook ons land is van die mooiste in die wêreld.

Wat doen jy vir ontspanning in Nederland?

Ek sing in kore, werk in die tuin en gaan na verskeie konserte.

Interessante feite oor Nederland

• Kinders word meestal tuis gebore en by uitsondering in die hospitaal.
• Nederland is ’n duur land, die verblyfopsies is ook aansienlik kleiner, dus is ons huise ook kleiner en kompak. Jy kan regkom met minder spasie, omdat jy ook ’n gedeelde leefomgewing in jou buurt het.

Bestuur van motors en bestuurslisensies – hoe verskil dit van Suid-Afrika?

Ek het ’n elektriese kar en is deur goeie bestuurder geleer om te bestuur. Ek hou wel daarvan om trein en fiets te ry.

Lees ook: ’n Jaar in Nederland en Die jaar wat my lewe verander het!

Skryf vir ons

Woon jy in die buiteland, of het jy dalk onlangs teruggekeer uit die buiteland? Jy kan ook vir ons ’n Uit en tuis-rubriek skryf. Stuur ’n e-pos na wereldwyd@afriforum.co.za en ons stuur vir jou vrae om te beantwoord.