Uit en tuis is ’n rubriek waarin ons gesels met mense wat in die buiteland woon, of wat daar gewoon en gewerk het, maar weer terug is in Suid-Afrika. Ons hoor graag van enigeen wat hul belewenisse met ons wil deel. Hierdie keer gesels ons met Annelene Kammer-Tischendorf, wat in Oostenryk woon.

Van waar in Suid-Afrika is julle oorspronklik, en hoekom het julle na Oostenryk verhuis?

Ek is oorspronklik van Gauteng. My ouers het in Krugersdorp gewoon, ek was in Pretoria op skool en het by Tukkies gestudeer. Later het ek in Centurion gebly en gewerk.

My oupa was Oostenryks van Joodse afkoms en het tydens die Tweede Wêreldoorlog met sy broer gevlug, uiteindelik in Suid-Afrika gevestig en met my ouma getrou. My pa is in 1949 gebore, en my oupa het beplan om met sy gesin na Oostenryk terug te keer, maar hy is tragies aan ’n hartaanval oorlede. My ouma, ’n Afrikaanse vrou, het in Suid-Afrika gebly.

Gedurende my meestersgraadstudies het ek ’n vriendin in Oostenryk besoek, waar ek ’n pos as wetenskaplike navorser by die Paris Lodron Universiteit van Salzburg aangebied is. Gefassineer deur my Oostenrykse wortels, het ek besluit om my staatsburgerskap terug te eis –’n proses wat vyf jaar geduur het. Uiteindelik kon ek bewys dat my oupa nooit sy Oostenrykse burgerskap opgegee het nie.

Vertel ons meer van jou gesin.

Ek is met ’n Oostenryker getroud en ons huisgesin bestaan uit my man, ons 15-jarige seun en ’n wollerige hond (’n kruising tussen ’n Birmaanse berghond en St. Bernhard). Ek het my man op ’n Kersmark ontmoet en ons seun is in Oostenryk gebore. Ons het van 2009 tot 2013 in Jordanië gewoon, waarna ons onsself in Kärnten naby die Wörthersee-meer gevestig het.

My seun is in ’n internasionale skool en is drietalig (Duits, Engels en Afrikaans). Hy beplan om biochemie te studeer en ons is baie trots op hom! My man, ’n wateringenieur, het ’n firma wat spesialiseer in drinkwaterprojekte in ontwikkelingslande. Ek is ’n geoinformasiespesialis en werk vir die energieverskaffer KELAG-Kärntner Elektrizitäts-Aktiengesellschaft.

Ons is lief vir die natuur, hou van stap en swem in die somer, en my man en seun geniet ski. Verder reis ons graag en verken nuwe plekke wanneer ons die kans kry.

Wat was die grootste aanpassing vir jou in die buiteland?

Die moeilikste was om te aanvaar dat vriendskappe hier anders gevorm word. In Suid-Afrika is mense gasvry en kuier maklik saam by mekaar se huise, terwyl mense in Oostenryk eerder in restaurante of koffiewinkels ontmoet. Aanvanklik was ek redelik eensaam, maar ek het kontak met geliefdes deur sosiale media gehou en mettertyd ’n klein Suid-Afrikaanse gemeenskap hier gevind. Hoewel ons ver verspreid bly, kuier ons lekker as ons mekaar sien en reël dan ’n braai, kyk saam Wêreldbekerrugbywedstryde en hou pieknieks.

Hoe leef julle jou Afrikanererfenis in die buiteland voort?

Al praat ek vlot Duits, bly Afrikaans my moedertaal. My seun het ook Afrikaans geleer, al is sy spelling gruwelik! Dit is vir my belangrik dat hy die taal ken, al is dit net om met my ouers in Afrikaans te gesels. Selfs ons hond verstaan Afrikaans!

Ek glo Suid-Afrikaners oor die algemeen is hardwerkende mense en veral in die buiteland waar dit moeilik is omdat ons so ver van ons geliefdes is, maak ons die beste van alles en triomfeer keer op keer. Ek waardeer Suid-Afrikaners se unieke sin vir humor en het onlangs ’n Afrikaanssprekende Namibiër in my span aangestel – ons skerts gereeld in Afrikaans en dit maak die werksomgewing aangenamer.

Ek het ook my man en seun geleer braai en potjiekos maak – iets wat ons gereeld in die somer doen.

Wat mis jy die meeste van Suid-Afrika?

Ek mis die Bosveld met sy pikdonker aande en naggeluide, asook die stormagtige Suid-Afrikaanse oseane en see en wit strande. Ek mis die reuk van die reëndruppels soos wat dit op die vrugbare rooi grond neerplof en die donderslae van die weerlig in Gauteng. My gunstelingherinneringe is vakansies in die Bosveld, Drakensberge en by die see.

Hoe vergelyk jou daaglikse lewe in Oostenryk met Suid-Afrika?

Ek woon in ’n klein dorpie langs die Wörthersee-meer. Die publieke vervoerstelsel is uitstekend en ek gebruik nou eerder die trein as my eie motor. My oggendtrein vertrek stiptelik om 07:00 en ná 15 minute is ek in Klagenfurt. Van daar is dit net ’n kort stap na my werk.

Winters hier is lank en donker, wat soms depressief kan wees, maar somers is fantasties! Ons het lang dagligure en kry vroeër af in die middae, wat heerlik is.

Oostenryk is oor die algemeen baie veilig. Kinders ry sonder probleme met openbare vervoer en vroue kan alleen in die berge of woude stap. Ons dorpie is idillies en anders as my destydse lewe in Suid-Afrika.

Watter geregte het jy geleer maak en watter Suid-Afrikaanse kos mis julle die meeste?

Ek kook meestal Suid-Afrikaans, maar het geleer om alternatiewe bestanddele te gebruik, aangesien nie alles hier beskikbaar is nie. Wanneer ons Suid-Afrika besoek, koop ons biltong, droëwors, blatjang en Bovril. Ek mis veral goeie beesvleis soos steaks en boerewors.

Hoe vergelyk lewenskoste en behuising in Oostenryk met Suid-Afrika?

Lewenskoste is hoër hier, veral behuising en kruideniersware. Hoewel salarisse in Oostenryk hoër is, betaal hoër verdieners ook hoër belasting. Oostenryk het ’n sterk staatsgesondheidsorgstelsel wat deur inkomsteverwante bydraes gefinansier word, terwyl Suid-Afrikaners dikwels op private mediese sorg staatmaak.

Die meeste mense woon in woonstelle, met ’n gemiddelde woonoppervlakte van 101,8 m². Sowat 43,7% van woonstelle word gehuur eerder as besit.

Wat doen jy vir ontspanning in Oostenryk?

Ons geniet die natuur, stap, swem en ski. Daar is baie kulturele geleenthede, en ons besoek gereeld die teater, opera en klassieke konserte.

Interessante feite oor Oostenryk:

• Oostenryk grens aan agt lande.
• Dit het een van die oudste nasionale vlae (sedert 1191).
• Dit is sedert 1945 neutraal en nie deel van enige militêre alliansie nie.
• Beroemde komponiste soos Mozart en Strauss kom hiervandaan.
• Die wêreld se eerste poskaart is in 1869 hier uitgereik.
• Red Bull en Swarovski is Oostenrykse handelsmerke.
• Sneeubolle of snow globes, ook bekend as Schneekugeln, word algemeen beskou as oorspronklik van Oostenryk. Die eerste sneeubolpatent is in 1900 deur Erwin Perzy, ’n Oostenrykse chirurgiese instrumentmaker, ingedien. Perzy het per ongeluk die sneeubol ontwerp terwyl hy probeer het om die helderheid van ’n gloeilamp te verbeter. Die effek van die deeltjies in die water het hom aan vallende sneeuflokkies herinner. Perzy se sneeubolle het baie gewild geword, en sy maatskappy, gebaseer in Wene, vervaardig hulle vandag nog!

Is daar Afrikaanse professionele diensverskaffers in Oostenryk?

Nie in ons deel nie. Jy moet Duits leer, aangesien selfs Engels jou beperk. In Wene is daar ’n groter Suid-Afrikaanse gemeenskap waar Engels meer algemeen verstaan word. Daar is byvoorbeeld ’n haarkapper, Joel’s Dreamhair Exklusiv, wat selfs Afrikaans kan praat!

Lees ook: Uit en tuis: ’n e-pos uit Auckland, Nieu-Seeland

Skryf vir ons

Woon jy in die buiteland, of het jy dalk onlangs teruggekeer uit die buiteland? Jy kan ook vir ons ’n Uit en tuis-rubriek skryf. Stuur ’n e-pos na wereldwyd@afriforum.co.za en ons stuur vir jou vrae om te beantwoord.