Deur Alana Bailey

Suid-Afrika is een van die lande wat gelukkig genoeg is om flaminkbevolkings te hê. Die bekendste broeikolonie kan gevind word by Kimberley se Kamfersdam. Dit is een van slegs vier broeikolonies in Afrika. Getalle wissel van 20 000 tot selfs 50 000 voëls! ’n Groep word ook net buite Stellenbosch aangetref. Wêreldwyd kom daar ses verskillende flaminkspesies voor.

Die naam flamink kom van die Spaanse woord flamengo, wat vlamkleurig beteken. Die kleur van hulle vere word deur hulle dieet bepaal. Hulle eet met hulle bekke onderstebo en beide geslagte produseer ’n spesiale vloeistof genaamd kropmelk in hul spysverteringskanaal waarmee hulle hulle kuikens voer. Flaminke is redelik groot, maar baie lig in gewig. Volwasse voëls weeg maar tussen 1.2 en 2.7 kilogram. Die rede waarom hulle op een been staan is nie om te rus nie, maar om liggaamshitte te bespaar.

Een eier word op ’n keer gelê op ’n nes wat hulle van modder bou. Na die kuikens uitgebroei het, sluit hulle aan by sogenaamde kleuterskole wat deur enkele volwasse georganiseer word. Die volwassenes lei hulle dan kilometers ver te voet na vars water. Ongelukkig is die flaminke wat in Suid-Afrika aangetref word (Phoeniconaias minor) ’n bedreigde spesie.

Foto: kyaw-tun-unsplash