Uit en tuis is ’n rubriek waarin ons gesels met mense wat in die buiteland woon, of wat daar gewoon en gewerk het, maar weer terug is in Suid-Afrika. Ons hoor graag van enigeen wat hul belewenisse met ons wil deel.

Vandeesweek gesels ons met Mariska Swart, wat in Perth, Australië woon.

Hallo, Mariska! Van waar in Suid-Afrika is julle oorspronklik en waarom het julle besluit om in Perth, Australië te gaan woon?

Ons is van Riebeeckstad, Welkom in die Vrystaat. My man het ’n baie goeie werkgeleentheid gekry in Perth, waarvoor ons nie kon nee sê nie.

Vertel ons meer van jou gesin.

Ek en my man is April volgende jaar agt jaar lank getroud; ek is 33 en hy 32. Ons het nog nie kinders nie, maar ons vertrou op die Here dat ons eendag met kinders geseënd sal wees.

Dit kan uitdagend wees om in ’n nuwe land aan te pas. Wat was vir jou die vreemdste om aan gewoond te raak in die buiteland? Wat was die grootste aanpassing vir jou in die buiteland?

Ek dink die grootste aanpassing is die leefwyse hier; dit is heeltemal anders as waaraan ons gewoond is. Dit was nogal ’n kultuurskok vir ons gewees. Die vreemdste (maar die mooiste) ding hier is al die papegaaie wat hier rondvlieg,(soos die duiwe en mossies in Suid-Afrika). Die grootste aanpassing vir my hierdie kant was om van voor af weer ’n lewe op te bou. 

Hoe gereeld sien julle familie mekaar?

Ons is nou maar eers ’n paar maande in Australië, maar beplan dat familie volgende jaar kom kuier. Maar ons gesels gereeld per WhatsApp video-oproepe maak (dankie tog vir tegnologie).

Praat julle nog Afrikaans met mekaar? Watter Suid-Afrikaanse tradisies leer julle vir jul kinders? Van watter Afrikaanse hulpmiddels maak julle gebruik?

Natuurlik praat ons nog Afrikaans, dit sal altyd ons taal by die huis wees. Sou ons in die toekoms kinders hê, gaan hulle natuurlik Engels in die skole hier leer, maar ons sal seker maak Afrikaans leef ook by hulle voort. 

Wat beteken jou Afrikanererfenis vir jou? Watter tradisies laat jy en jou gesin in die buiteland voortleef?

Om ’n Suid-Afrikaner te wees, is al wat ons ken, en ons is trotse Suid-Afrikaners. Braai is natuurlik een van die grootste tradisies wat voortleef hier saam met ons in Perth.

Wat is die een ding wat jy wens jy in jou tas kon pak toe jy geëmigreer het?

Meer foto’s! 

Hoe verskil die kossoorte in Australië van dié in Suid-Afrika?

Australië het ’n groot verskeidenheid kossoorte (weens al die verskillende kulture wat hier is). Maar ons probeer alles; mens kan nie sê dat jy nie van iets hou as jy dit nog nie probeer het nie. Ons maak wel kort-kort ’n draai by ons naaste Suid-Afrikaanse winkel en gaan koop goed daar waarmee ons bekend is.

Wat doen jy vir ontspanning in Australië?

Ons gaan stap op die strand of ons gaan ry met ons fietse al langs die rivier af. 

Oorlewingslysie vir die somer in Australië

Sonblok! Sonblok! Sonblok!

Watter interessanthede het jy ontdek van die land waar jy woon waarvan jy nie vantevore geweet het nie?  

Die meeste van Australië se diere is dodelik giftig.

Enige lesse wat julle geleer het?

Die grootste en beste les wat ons geleer het is: Bly op jou knieë, bid aanhoudend en praat elke dag met die Here. Immigrasie is nie maklik nie, maar met die Here aan ons kant is ons reg vir enigiets.

Lees ook: Uit en tuis: ʼn e-pos uit Montana, Amerika

Skryf vir ons

Woon jy in die buiteland, of het jy dalk onlangs teruggekeer uit die buiteland? Jy kan ook vir ons ’n Uit en tuis-rubriek skryf. Stuur ’n e-pos na wereldwyd@afriforum.co.za en ons stuur vir jou vrae om te beantwoord.