Deur Alana Bailey

Hierdie tyd van die jaar is besonder geskik vir ’n toer deur die Nasionale Krugerwildtuin. Trek ’n been biltong en jou knipmes nader en toer saam van die Phabeni-hek verby Skukuza en Laer Sabie tot by die Malelane-hek.

Daar is ontmoetings met rooibokke, ’n visarend, bobbejane, kameelperde, reuse- of Goliatreier, breëkoparend, krokodille, waterskilpaaie, vlakvarke, seekoeie, koedoes, klipspringer, buffels en olifante. Geniet die klanke van die bos en voel Afrika roep in jou hart!

Almal wil natuurlik graag die Groot Vyf in die Krugerwildtuin sien, maar daar word nog 142 ander soogdierspesies ook aangetref. Dit is wel moontlik om die Groot Vyf almal op een dag raak te loop. Volgens SANParke se webwerf is daar sowat 1 620 tot 1 750 leeus, 13 750 olifante, 1 000 luiperds en 37 130 buffels in die wildtuin. Die aantal renosters word vir veiligheidsredes nie genoem nie.

Die beeldmateriaal is onlangs deur Katie en André van Two-V Productions op hulle You Tube-kanaal geplaas. Hartlike dank aan hulle vir pragtige video’s! Teken asseblief in op dié kanaal en volg hulle Facebookblad. Boeke in hulle Op Vlerke-reeks kan van Kraal Uitgewers bestel word en is ook weer in die winkels in ruskampe van die Nasionale Krugerwildtuin beskikbaar.