Die unieke verhouding wat tussen Afrikaners en Russe bestaan, strek reeds oor generasies en is waarskynlik veral gedurende die Anglo-Boereoorlog (1899-1902) versterk. Net meer as 220 Russe het hulle as vrywilligers gedurende dié oorlog aan Boerekant geskaar, maar die steun in Rusland was tog enorm. Sedertdien is Afrikaners en Russe se vriendskapsbande op verskeie uiteenlopende terreine versterk, insluitende op sportgebied.

In hul jongste boek, Persoonlike vriendskappe: Boere & Russe stel die gerekende fotograaf Wessel Oosthuizen en die Afrikaanse uitgewer en skrywer van tientalle boeke (insluitende Kamphoer), Nico Moolman, ondersoek in na dié twee gemeenskappe se vriendskappe. Die boek stof onder meer die buitengewone verhaal van die ontsnapping van Willie Steyn en sy vier makkers gedurende die Anglo-Boereoorlog af, en stel ondersoek in na die jong Boeremeisie, Martha Uys, wat ’n sterwende Russiese kaptein gedurende die oorlog verpleeg het.

Persoonlike vriendskappe vertel ook die verhale van meer onlangse vriendskappe tussen Boere en Russe wat veral op die sportveld gesmee is. Selfs die wêreld van spioenasie kom onder die soeklig in die afdelings oor Gerard Ludi, die Suid-Afrikaanse spioen wat die Russiese Kommunistiese Party in 1963 geïnfiltreer het, en Yuri Loginov, die Russiese spioen wat in Suid-Afrika gearresteer is.

Die boek is tweetalig – in Afrikaans én Russies – en is daarom ’n tasbare voorbeeld van die samewerking tussen Afrikaners en Russe. Persoonlike vriendskappe is tans beskikbaar by Kraal Uitgewers teen slegs R375. Besoek Kraal se aanlyn boekwinkel om ’n bestelling te plaas.