Deur Monique Simon
Ons het nooit gedink dat ons eendag sou emigreer nie. Kanada was nie deel van ons plan nie – nie eers ’n droom nie. Maar soms verras die lewe jou met ’n nuwe rigting, en dit lei jou na iets groters as wat jy ooit kon voorstel.
Vier jaar gelede het ons gesin – Lubin, Monique en ons twee dogtertjies, Lumé (toe 3 jaar oud) en Amoré (net 9 maande) – ons tasse gepak en Suid-Afrika verruil vir Kanada. Wat begin het as ’n proeflopie, het vinnig werklikheid geword toe Lubin ’n werkgeleentheid hier ontvang het. Dit was die deur wat oopgegaan het … en ons het ingestap met hoop en geloof, al was ons harte swaar.
Die oorgang was emosioneel. Ons het nie net ’n land agtergelaat nie, maar ook familie, vriende, kultuur en alles wat vir ons bekend was. Maar ons het besluit om vas te byt en hard te werk vir ’n beter toekoms vir ons kinders. In daardie proses het Kanada vir ons ’n tweede tuiste geword.
Wat ons reis besonders gemaak het, is die ongelooflike Suid-Afrikaanse gemeenskap wat ons hier ontdek het. Veral een egpaar – self nou Kanadese burgers – het ons van dag een af ondersteun. Vandag noem ons hulle ons “Kanadese ouma en oupa”. Hulle liefde, raad en omgee het ons deur moeilike tye gedra.
Ons is ook opreg dankbaar vir die wonderlike vriende wat ons hier gemaak het – mense wat ons as familie ingeneem het. Hulle het Kanada vir ons soos ’n ware huis laat voel. Sonder hulle sou hierdie pad baie alleen gevoel het.
Vandag, vier jaar later, staan ons sterk. Ons kinders floreer. Ons harte is dankbaar. En ons weet: hoewel ons wortels in Suid-Afrika lê, groei ons nou wêreldwyd.
Aan enige Suid-Afrikaner wat daaraan dink om te emigreer: dit is nie maklik nie, maar dit is moontlik. Met geloof, harde werk en die ondersteuning van ’n sterk gemeenskap en goeie vriende, kan jy ’n nuwe lewe bou. En soms wag daar iets mooier as wat jy ooit kon droom … aan die ander kant.
Baie dankie aan AfriForum Wêreldwyd vir julle ondersteuning van Suid-Afrikaners reg oor die wêreld. Julle maak die wêreld kleiner – en die hart voller.
Deel jou storie met ons
Elke ervaring is uniek – of dit oor werk, aanpassing, kultuur, familie of net jou alledaagse leefwêreld gaan.
AfriForum Wêreldwyd bied ’n ruimte waar jou perspektief sin maak vir ander wat dalk soortgelyke paaie loop.
Lees ook: Van die Vrystaat tot Queensland: ’n Lewe van aanpassing en dankbaarheid – AfriForum Wêreldwyd
Deel op
