Deur Breytenbachs Immigration Consultants

Die Konstitusionele Hof van Suid-Afrika het ’n belangrike uitspraak gelewer wat die regslandskap ingrypend verander vir duisende Suid-Afrikaanse burgers wat hul burgerskap verloor het. Hierdie ontwikkeling het verreikende implikasies vir persone wat hierdeur geraak word en open ’n belangrike geleentheid vir die herstel van dié persone se Suid-Afrikaanse burgerskap. In hierdie artikel verduidelik Breytenbachs die regsgevolge, die Departement van Binnelandse Sake se huidige riglyne en hoe persone wat hierdeur geraak word hulself op die volgende stappe kan voorberei.

Konstitusionelehofuitspraak

Op 6 Mei 2025 het die Konstitusionele Hof van Suid-Afrika (Democratic Alliance v Minister of Home Affairs and Another [2025] ZACC 8) beslis dat Artikel 6(1)(a) van die Suid-Afrikaanse Burgerskapwet 88 van 1995 ongrondwetlik is en dit met onmiddellike effek ongeldig verklaar, terugwerkend vanaf die datum van inwerkingtreding op 6 Oktober 1995.

Die uitspraak deur regter Majiedt bevestig dat volwasse Suid-Afrikaners wat ingevolge Artikel 6(1)(a) van dié Wet hul burgerskap verloor het omdat hulle nie stappe gedoen het om hul Suid-Afrikaanse burgerskap te behou voordat hulle ’n buitelandse burgerskap verkry het nie, inderdaad nie hul burgerskap verloor het nie.

Belangrike regsgevolge

Eerstens is Suid-Afrikaanse burgers nie meer verplig om hul burgerskap voor aanvaarding van ’n tweede burgerskap te beskerm nie, aangesien Artikel 6(1)(a) van die Wet nou met onmiddellike effek ongeldig verklaar is. Suid-Afrikaners met hangende aansoeke om hul burgerskap te behou, behoort raad te ontvang oor die regstellende stappe wat die Departement van Binnelandse Sake (DBS)nou moet doen. Die DBS het tot nou toe nog geen proses aangekondig nie. Let daarop dat slegs Artikel 6(1)(a) ongrondwetlik verklaar is – dit is dus slegs persone wat hul burgerskap ingevolge hierdie artikel verloor het wat deur hierdie uitspraak geraak word.

Tweedens bevestig die hof dat daar geen dispuut oor die opskorting en beperking van die terugwerkende gesag van die ongeldigheidsverklaring was nie. Dit beteken dat Suid-Afrikaners wat hierdeur geraak is nie outomaties weer as burgers beskou word nie.

Dr. Leon Schreiber, Minister van Binnelandse Sake, het bevestig dat die DBS nie net hierdie uitspraak sal nakom nie, maar reeds begin het om betrokke persone te help om hul burgerskap te bevestig en te herstel.

Die DBS is besig om ’n toegewyde aanlyn platform te ontwikkel waar enigiemand wat meen dat hulle deur die ongrondwetlike bepaling geraak is ’n aansoek kan indien om hul burgerskap te herstel, ongeag waar hulle hul in die wêreld bevind.

Sodra die platform en aansoekbesonderhede beskikbaar gestel is, sal dié Suid-Afrikaners in staat wees om aansoek te doen vir bevestiging van hul burgerskap en/of die herstel daarvan.

Derdens moet Suid-Afrikaners wat hierdeur geraak word daarop let dat artikel 6(1)(a) slegs met ingang 6 Oktober 1995 ongeldig verklaar is en nie vóór hierdie datum nie.

Ons beveel aan dat Suid-Afrikaners oorsee hul persoonlike besonderhede nagaan om vas te stel of hulle onder die bestek van hierdie artikel val. Hulle kan ook vir Breytenbachs Immigration kontak vir advies oor hul moontlike reg op die herinstel van hul burgerskap.

Laastens kan die DBS riglyne publiseer wat voorlopige maatreëls uiteensit vir persone wat reeds aansoek gedoen het om burgerskap te behou of dit oorweeg. Hierdie riglyne kan moontlik binne hul administratiewe en regsbevoegdhede van die huidige stand van sake afwyk. Verdere kommunikasie sal deur Breytenbachs Immigration gepubliseer word sodra nuwe inligting aan die lig kom.

Wat beteken dit vir Suid-Afrikaners in die buiteland?

Hierdie uitspraak beïnvloed Suid-Afrikaners wat in die buiteland woon en onbewus was van of nie aan die vorige vereistes voldoen het om hul burgerskap te behou nie. Die ongeldigverklaring van artikel 6(1)(a) verseker dat hierdie mense nie meer hul burgerskap as verlore hoef te beskou nie.

Dit is baie belangrike nuus vir persone wat nog familie- of eiendomsbande in Suid-Afrika het, of beplan om moontlik in die toekoms na Suid-Afrika terug te keer. Dit bied ’n geleentheid om hul volle regte en identiteit as Suid-Afrikaners te herstel.

Voorbereiding vir die herinstellingproses

Terwyl die DBS die nuwe riglyne opstel, raai ons mense aan om solank die volgende dokumentasie bymekaar te maak:

• afskrif van hul Suid-Afrikaanse geboortesertifikaat of vorige paspoort
• bewys van wanneer buitelandse burgerskap verkry is
• korrespondensie met die DBS (indien van toepassing)
• bewyse van vorige pogings om burgerskap te behou
• vorige ID’s of ID-kaarte.

Sodra die platform en riglyne beskikbaar is, is dit belangrik om vinnig op te tree om vertragings te vermy.

Hoe Breytenbachs Immigrasie jou kan help

Breytenbachs Immigrasie beskik oor meer as drie dekades se ervaring in immigrasiereg. Ons help Suid-Afrikaners wêreldwyd met:

• deskundige evaluasies van hul regte onder die nuwe wetgewing
• hulp met die voorbereiding en indiening van aansoeke
• deurlopende inligting oor die DBS se nuwe stelsel.

Kontak ons vandag vir persoonlike raad en ondersteuning.

Besoek https://www.bic-immigration.com/contact/ om met ’n kundige konsultant te gesels.

Vrywaring

Hierdie artikel is slegs vir inligtingsdoeleindes en word nie as regsadvies voorgehou nie. Raadpleeg asseblief ’n gekwalifiseerde immigrasiespesialis vir raad oor jou spesifieke saak.