Dit is uitdagend om in ’n nuwe land aan te pas. Alles is verskillend, en om jou gunsteling- Suid-Afrikaanse produkte op te spoor kan nogal in ’n avontuur ontaard. Gelukkig is Wêreldwyd hier om te help. Wêreldwyd se Wêreldgids is uniek. Hier kan jy ’n versameling Suid-Afrikaanse ondernemings van reg oor die wêreld vind wat ’n netwerk van Suid-Afrikaners in die buiteland vorm. Hierdie week se onderneming in die Kollig is FynBosch Design in Nederland.

“FynBosch Design is geïnspireer deur die natuur, beïnvloed deur kuns en ontwerp, gedryf deur balans, gemotiveer in eenvoud en deel die kalmte van ’n organiese leefstyl. Dít is wat my aanspoor om te skep,” sê Anneke Bosch, eienaar van FynBosch Design.

Anneke het in die Suid-Afrikaanse natuur grootgeword waar kleur en tekstuur gedurig deel van haar lewe was. Haar omgewing tydens haar kinderjare het daartoe gelei dat sy die eenvoudige dinge wat ons elke dag omring meer waardeer.

Die naam FynBosch is geïnspireer deur die delikate Suid-Afrikaanse flora fynbos wat plaaslik in Suid-Afrika groei, in kombinasie met haar van – dus bly sy trou aan haarself en die wortels waar haar grootste inspirasie vandaan kom.

Anneke woon tans in Nederland en versamel wilde flora plaaslik of terwyl sy in die buiteland reis om bekostigbare organiese kunsstukke te ontwerp, en sodoende die natuur weer terug te bring in ons huise. Daar is ’n fyn balans in die natuur wat sy poog om in elke individuele stuk weer te gee, en daarom gebruik sy slegs natuurlike materiale en veselstowwe soos sybokhaar, wol, katoen, linne, bamboes en sy. Die flora self word ook in hul natuurlike vorm behou om die broosheid van die lewe te reflekteer, en ons te herinner om te fokus op die rou skoonheid wat ons daagliks omring.

Elke stuk word deur die natuur se oorvloed beïnvloed en liefdevol geskep met voortreflike aandag aan detail en geduld.

Kontak FynBosch Design:

Telefoon: +31 6 57307781

E-pos: anneke@fynboschdesign.com

Klik hier om FynBosch Design op Facebook te besoek.

Klik hier om FynBosch Design op Wêreldwyd se Wêreldgids te besoek.