Wat beteken dit om ’n nomadegade te wees?

Mary Bralove het die term “trailing spouse” in 1975 geskep om die ervaring van ’n eggenoot te beskryf wat verhuis as gevolg van hul lewensmaat – gewoonlik die hoofbroodwinner – se loopbaan.

’n Nomadegade verwys na die eggenoot of lewensmaat van iemand wat na ’n ander land verhuis, dikwels as gevolg van loopbaangeleenthede, en wat hul lewe herorganiseer om hul maat te ondersteun. Die term beskryf iemand wat hul bekende omgewing, loopbaan en lewenstyl prysgee, en ’n nuwe rol in ’n ander land aanneem. Hierdie opofferings gaan dikwels gepaard met uitdagings soos loopbaanontwrigting, kulturele aanpassing en isolasie.

Die opgewondenheid van ’n buitelandse werksaanbod is aansteeklik – ’n nuwe begin, ’n groter salaris, en moontlikhede wat die verbeelding aangryp. Maar vir die persoon wat nie in die kollig van die werk staan nie, kan hierdie skuif ’n emosionele tuimeltreinrit wees. Nomadegades, oftewel “trailing spouses”, kom voor unieke uitdagings te staan wat maklik oorweldigend kan raak.

Grootste uitdagings vir nomadegades

1. Loopbaanontwrigting

Terwyl jou maat se loopbaan vorder, bly jou eie drome en doelwitte dalk agterweë. As jy byvoorbeeld nie werkvisums het nie, of as die mark vir jou vaardighede beperk is, kan die onsekerheid jou oorweldig.

2. Kultuurskok

’n Nuwe land beteken nuwe reëls, nuwe gebruike, en soms selfs ’n nuwe taal. Alhoewel hierdie veranderinge geleenthede vir groei bied, kan dit ook die gevoel van ontworteling en isolasie vererger.

3. Verlies van identiteit

Wanneer jy nie meer werk het of aan doelgerigte aktiwiteite deelneem nie, is dit algemeen om jou eiewaarde te begin bevraagteken. Dit is ’n normale reaksie, maar daar is maniere om dit te hanteer.

Hier is ’n paar wenke en wyshede om jou reis makliker en meer betekenisvol te maak.

Wenke vir nomadegades

Bou ’n ondersteuningsnetwerk

Soek groepe en gemeenskappe wat jou waardeer en jou help om tuis te voel. Sluit aan by plaaslike klubs, kerke of ekspatgroepe. Gebruik hulpmiddels soos AfriForum Wêreldwyd se Wêreldgids om ondernemings, diensverskaffers en gemeenskapsorganisasies in jou nuwe omgewing op te spoor.

Kommunikeer met jou maat

Gesels openhartig met mekaar oor jul gevoelens en uitdagings. Wees eerlik oor julle ervarings en werk saam om mekaar se emosionele behoeftes te ondersteun. Sit tyd opsy om gereeld gehaltetyd saam deur te bring.

Bly fisiek en emosioneel gesond

Oefening is nie net goed vir jou liggaam nie, maar ook vir jou gemoedstoestand. Selfs ’n eenvoudige wandeling in ’n parkie kan jou help om te herlaai. Gee ook aandag aan jou emosionele gesondheid deur daarteen te waak dat jy jouself isoleer. Soek interaksies en aktiwiteite wat jou gelukkig maak. Maak ’n punt daarvan om by die gemeenskap in te skakel deur plaaslike geleenthede by te woon, of leer ken jou bure deur hulle oor te nooi vir koffie. Dit beteken nie dat jy jou eie kultuur afsterf nie, maar eerder dat jy begin deel raak van ’n nuwe netwerk in ’n nuwe land of stad.

Leer en groei

Gebruik die geleentheid om nuwe vaardighede aan te leer. Skryf in vir kursusse met groepklasse, begin ’n nuwe stokperdjie of bring selfs jou eie onderneming op die been. Dit sal jou nie net ’n gevoel van prestasie gee nie, maar ook ’n nuwe doel om na te streef.

Verken jou nuwe wêreld

Maak die buitelandse ervaring jou eie. Verken jou nuwe omgewing, probeer nuwe kosse en geniet die unieke kulturele hoogtepunte. Hierdie avontuur bied ’n geleentheid om nuwe herinneringe te skep.

Om ’n nomadegade te wees kan uitdagend wees vir jou verhouding en persoonlike lewe, maar dit bied ook ongelooflike geleenthede om jou karakter en verhoudings te versterk. Deur ondersteuningsnetwerke te bou, openlik te kommunikeer en ’n proaktiewe benadering tot jou aanpassing te hê, kan jy nie net oorleef nie, maar floreer.

Onthou, jou reis as nomadegade is uniek en kosbaar. Dit is ’n geleentheid om jouself op nuwe maniere te ontdek en ’n sterker weergawe van jouself te word. Laat die wêreld jou wysheid en insigte verryk, en wees onverskrokke in jou reis na selfontdekking.

Deel jou wenke om ander mense te help om hierdie reis makliker en meer betekenisvol te maak. Wat het jou gehelp om kultuurskok te verwerk? Hoe het jy jou ondersteuningsnetwerk gebou? Het jy ’n verrassende stokperdjie of loopbaan in die buiteland ontdek?

Foto’s: Getty Images/Unsplash