Die storie van Chris Barnard en die eerste hartoorplanting.

Vyftig jaar ná die eerste hart suksesvol van een mens na ’n ander oorgeplant is, kan jy nou in ’n nuwe dokudrama oor die menslike intrige rondom die gebeure van 3 Desember 1967 sien presies hoe dié groot mediese mylpaal bereik is. Deon Opperman, die draaiboekskrywer, vertel in Hartstog drie parallelle verhale: Eerstens, dié van die Washkansky-familie, wat dringend wag op ’n skenkerhart vir Louis; die Darvall-gesin, wat as gevolg van ’n tragiese ongeluk ’n dogter aan die dood afstaan, en dr Chris Barnard en die span by die hospitaal wat die hart help oorplant

André Velts is die regisseur aan die stuur van dié dokudrama, wat ook ’n sterbelaaide rolverdeling insluit. Die bekroonde akteur Carel Nel staan in die skoene (en teaterklere) van dr Chris Barnard, terwyl sy vrou Aletta deur Quinne Brown gespeel word. Jacques Bessenger vertolk die rol van dr Barnard se sjirurg-broer, Marius.

As jy nog altyd meer wou weet oor die eerste hartoorplanting, maak seker jy kyk Hartstog op ShowMax. Dis ’n verhaal van hartstogtelike passie, gebreekte harte en hoop wat uiteindelik lig werp op ’n stuk trotse Suid-Afrikaanse geskiedenis wat die wêreld verander het.