Uit en tuis is ’n rubriek waar ons gesels met mense wat tans oorsee woon, of wat vroeër daar gebly en gewerk het. Hierdie week gesels ons met Angelique Scheun wat in Dubai woon.

Hallo Angelique, dit is heerlik om met jou te gesels!

Van waar in Suid-Afrika is julle oorspronklik, en hoekom het julle besluit om juis in Dubai te gaan woon?

Ons is ’n gesin van vyf en kom oorspronklik van Brakpan in Gauteng. Ongeveer drie jaar gelede het ons besluit om na Dubai te trek vir ’n werksgeleentheid – dit was ook ’n kans om in ’n veiliger land te woon. ’n Mens kan ongelukkig nie permanent emigreer na die VAE nie, maar jy kan wel verblyfreg behou as jy ’n werksvisum kry of ’n onderneming begin.

Hoe het jy die emigrasieproses ervaar? Was daar iets wat jou verras het of wat moeiliker was as wat jy verwag het?

Die trekproses was baie stresvol – alles was vreemd en nuut. Maar dit het ook baie vinnig gebeur, en ons is goed ontvang. Die mense hier is vriendelik, al verstaan ons mekaar nie altyd perfek nie. Maar “Good morning” ken almal! Ons het geweet dit gaan warm wees, maar niks kon my voorberei op die uiterste hitte in die somer nie. Dit is iets wat jy self moet ervaar om regtig te verstaan.

Hoe het julle julself gevestig in die gemeenskap? Was dit maklik om voete te vind en nuwe vriende te maak?

Om vriende te maak in die VAE was een van die maklikste dinge vir my. Jy moet net aktief betrokke raak – skoolbyeenkomste, ’n kerk, en natuurlik Afrikaanse funksies so nou en dan. Maar om jou voete te vind is ’n ander saak. Die kos lyk vreemd en smaak anders as waaraan ons gewoond is. Die kinders word vreemd aangekyk omdat hulle kaalvoet loop – en jy sweet so erg dat jy nie jou eie gesig herken nie!

Het julle al ’n netwerk of sosiale kring opgebou in Dubai? Kom julle soms bymekaar?

Daar is baie Suid-Afrikaners in Dubai – meer as wat mens sou verwag. Ons hou van kamp, braai, gholf speel en 4×4 ry in die woestyn – alles saam met vriende wat ons hier ontmoet het. Ons kom gereeld bymekaar, veral in die wintermaande wanneer dit lekker is om buite te wees.

Wat mis jy die meeste van Suid-Afrika, dalk iets kleins wat ander dalk nie sou verwag nie?

Definitief die winter en die reën – veral die reën!

Wat het jou verras of beïndruk van die mense in Dubai se leefstyl of kultuur?

Beslis die veiligheid. Jy kan jou kar oral oop los met die sleutels daarin – ons het al drie jaar lank nog nooit die sleutels uit ons karre gehaal nie. Mense laai hul fone in die gange van winkelsentrums en los dit sommer daar – niemand vat daaraan nie. Die veiligheid is ongelooflik.

Wat doen jy en jou gesin vir ontspanning daar? Is daar iets uniek aan Dubai wat julle geniet?

As gesin hou ons daarvan om gereeld see toe te gaan en verskillende dorpe in die VAE te ontdek. Die speelplekke vir kinders is fantasties – alles is baie kindervriendelik. Ons kamp so veel as moontlik in die winter, stap gereeld en besoek parke en die dieretuin. Daar is regtig so baie om te doen – ons ontdek nog elke dag iets nuuts.

Watter lesse het julle as gesin geleer sedert julle verhuis het – oor julleself, oor aanpassing, of oor julle nuwe omgewing?

Dat enigiets in ’n oogwink kan verander – maak nie saak in watse situasie jy is nie, goed of sleg.

Praat julle nog Afrikaans by die huis? Hoe belangrik is dit vir jou om die taal en kultuur te behou?

Dis vir ons baie belangrik. Ons het ’n reël in die huis dat ons net Afrikaans met mekaar praat – anders gaan die kinders dit heeltemal vergeet.

Is daar Suid-Afrikaanse winkels of produkte naby julle beskikbaar of moet julle kreatief raak om ’n smaak van die huis te kry? Het julle al professionele diensverskaffers gevind wat Afrikaans kan praat?

Meeste van die produkte is hier beskikbaar, maar teen ’n hoë prys. Ons het wel Suid-Afrikaanse dokters en by ons kinders se skool is daar baie Suid-Afrikaanse onderwysers.

As jy aan hierdie emigrasiehoofstuk in jou lewe ’n titel sou gee, wat sou dit wees en hoekom?

Wel nie emigreer nie, maar die trek: Verandering is goed.

Wat sou jy sê is die grootste verandering in jouself sedert jy geëmigreer het?

Ek is meer rustig, veral oor my gesin se veiligheid. Ek het ook my Engels verbeter en geleer om makliker nuwe mense te ontmoet.

Is daar enigiets anders wat jy met ons wil deel – iets wat jy wens jy geweet het voor julle vertrek het, of raad vir ander wat oorweeg om dieselfde pad te stap?

My raad aan enigiemand wat dit oorweeg: DOEN DIT! Jy weet nooit wat jy mis totdat jy nie iets nuuts probeer nie. Die gras is nie altyd groener aan die ander kant nie – maar soms is dit sand, en dié sand gee jou ’n nuwe perspektief en insig in die lewe.

Lees ook: Uit en tuis: ’n e-pos uit Kanada