Deur Alicia Venter | Komyn & Komyntjie

Toe ons in Desember 2023 ons lewe in Suid-Afrika opgepak en Australië toe getrek het, het ek nie geweet hoe diep emigrasie my sou verander nie.

Ons het gekom met hoop. Hoop vir ons kinders, hoop vir nuwe geleenthede en hoop vir ’n nuwe begin. Maar saam met die opgewondenheid het daar ook ’n kant van emigrasie gekom waarvoor niemand my regtig kon voorberei nie.

Die verlange. Die eensaamheid. Die skuldgevoel wanneer jy wonder of jy die regte besluit geneem het. Die dae wanneer almal by die huis aangaan met hulle lewens en jy besef jy is nou aan die ander kant van die wêreld. Die uitdaging om weer van voor af te begin en jou plek te probeer vind in ’n land waar alles terselfdertyd bekend én vreemd voel.

Dit was juis binne hierdie nuwe hoofstuk van my lewe dat Komyn & Komyntjie begin groei het.

Aan die begin was dit eenvoudig. Ek wou skryf. Ek wou eerlik wees oor die lewe, geloof, emigrasie, moederskap en die dinge waarmee ons soms agter geslote deure worstel. Ek wou ’n plek skep waar iemand ’n boodskap kon lees en dink: “Ek is nie die enigste een wat so voel nie.”

Mettertyd het ek egter begin besef dat Komyn & Komyntjie besig was om veel meer te word as net ’n sosialemediablad.

Geloof • Genesing • Groei
Hierdie drie woorde het uiteindelik die hart van Komyn & Komyntjie geword.

Ek glo ons almal stap deur verskillende hoofstukke. Party hoofstukke is mooi. Ander sou ons, as ons kon, uit ons lewensverhaal wou skeur.

Ek ken self iets van gebrokenheid, verlies, verkeerde keuses, teleurstelling en weer van voor af begin. Maar ek het ook geleer dat God nie net in die mooi hoofstukke teenwoordig is nie.

Soms is dit juis in die hoofstuk wat jy nooit sou gekies het nie, waar die meeste groei plaasvind.

Daarom probeer ek nie deur Komyn & Komyntjie ’n prentjie van ’n perfekte lewe of perfekte geloof skep nie. Inteendeel. Ek wil ruimte maak vir eerlike gesprekke. Vir vrae. Vir mense wat nog besig is om dinge uit te “figure”. Vir die persoon wat lief is vir God, maar terselfdertyd moeg, seergemaak of onseker is.

Van ’n blad na ’n gemeenskap Wat as eenvoudige skryfwerk begin het, het stadigaan in ’n gemeenskap ontwikkel.

Vandag bied ek onder andere ’n gratis Afrikaanse aanlyn Bybelstudie vir vroue op Zoom aan. Vroue van verskillende lande het al ingeskakel, en dit bly vir my besonders om te sien hoe Afrikaanssprekende vroue wat duisende kilometers van mekaar af woon, vir ’n uur saam rondom God se Woord kan sit.

Ons praat oor geloof, maar ook oor die werklikheid van die lewe – gebrokenheid, identiteit, liefde, verlies, emigrasie, uitputting, vergifnis en die seisoene waarin God soms stil voel.

Hier in Australië het Komyn & Komyntjie ook begin groei na persoonlike byeenkomste en vroue-oggende waar vroue kan saamkom, iets kreatiefs kan doen, eet, koffie drink, lag, gesels en sommer net weer ’n bietjie asemhaal.

Daar is ook ondersteuning rondom emigrasie en een-tot-een-gesprekke, veral vir mense wat deur die emosionele kant van groot lewensveranderinge werk.

Ek is verder besig om my studies in sielkunde, berading en geestesgesondheid voort te sit. Vir my is dit belangrik om voortdurend te leer en verantwoordelik om te gaan met die mense wat hulle stories en kwesbaarheid met my deel.

Nog ’n deel wat baie na aan my hart lê, is om mense se emigrasiestories te vertel. Daar is soveel wysheid in die stories van mense wat jare gelede hulle tasse gepak en ’n nuwe lewe in ’n vreemde land begin het. Wanneer ons hierdie stories deel, besef iemand wat vandag op maand drie van emigrasie is dalk dat daar hoop is vir jaar drie, vyf of tien.

Afrikaans aan die ander kant van die wêreld Een van die dinge wat ek sedert emigrasie opnuut begin waardeer het, is ons taal.

Daar is iets besonders daaraan om aan die ander kant van die wêreld iemand Afrikaans te hoor praat. Skielik voel ’n vreemde plek vir ’n oomblik ’n bietjie meer soos huis.

Daarom is Afrikaans ook ’n belangrike deel van Komyn & Komyntjie.

Dit gaan vir my nie daaroor om vas te hou aan die verlede en nooit deel te word van die land waar ons nou woon nie. Inteendeel – Australië het vir ons ongelooflike geleenthede gebied en ons bou met dankbaarheid ’n lewe hier.

Maar ek glo ook jy hoef nie jou wortels uit te trek om nuwe takke te laat groei nie.

Jy kan dankbaar wees vir jou nuwe land én steeds lief wees vir die plek waar jy vandaan kom. Jy kan nuwe tradisies bou en steeds jou kinders van hulle Afrikaanse erfenis vertel. Jy kan vorentoe beweeg sonder om te maak asof die lewe wat jy agtergelaat het nooit bestaan het nie.

Komyn & Komyntjie het saam met my gegroei Wanneer ek vandag kyk na wat Komyn & Komyntjie geword het, besef ek dat ek nooit aan die begin ’n volledige plan daarvoor gehad het nie.

Dit het saam met my gegroei.

Van sosialemediaboodskappe tot Bybelstudies. Van aanlyn gesprekke tot vroue-oggende. Van emigrasieplasings tot ondersteuning, hulpbronne en spreekgeleenthede.

En ek glo ons is nog maar aan die begin.

My droom is dat Komyn & Komyntjie uiteindelik ’n plek sal wees waar mense, ongeag in watter land hulle woon of in watter hoofstuk van hulle lewe hulle hulself bevind, iets sal vind wat hulle help om weer vorentoe te beweeg.

Nie omdat ek al die antwoorde het nie.

Maar omdat ek weet hoe dit voel om self deur moeilike hoofstukke te stap.

As ek een ding vir ’n mede-immigrant kon sê … Moenie jou storie meet aan iemand anders s’n nie.

Party mense land in ’n nuwe land en lyk binne ses maande asof hulle nog altyd daar gewoon het. Vir iemand anders neem dit jare om weer werklik tuis te voel.

Gee jouself genade.

Jy mag jou familie mis en steeds dankbaar wees dat jy geëmigreer het. Jy mag Suid-Afrika mis en lief wees vir Australië. Jy mag soms wonder of julle die regte besluit geneem het sonder dat dit beteken julle het die verkeerde besluit geneem.

Emigrasie leer jou dat ’n mens se hart soms op meer as een plek kan behoort.

Jou storie hoef nie perfek te wees om betekenis te hê nie.
Jou moeilike hoofstuk hoef nie die einde van jou verhaal te wees nie.
Daar is steeds ruimte vir geloof, genesing en groei.

Ek is Alicia Venter – vrou, mamma van drie, immigrant, spreker, student en die vrou agter Komyn & Komyntjie.

En as daar een ding is wat hierdie reis my geleer het, is dit dat ons dikwels nie besef wat God uit ’n klein saadjie kan laat groei wanneer ons eenvoudig bereid is om dit te plant nie.

Komyn & Komyntjie
www.komynkomyntjie.com